1447 ވަނަ އަހަރުގެ ބަރަކާތްތެރި ރަމަޟާންމަހަށް ގޭބިސީތަކަށް ސަރުކާރުން ފޯރުކޮށްދޭ މަސްދަޅުކޭސް ބެހުމުގެ މަސައްކަތުގެ ދަށުން މިފްކޯ މައި އޮފީހުން މިރެއިން ފެށިގެން މަސްދަޅު ދޫކުރަން ހަމަޖައްސައިފިއެވެ.
މާލެ ސަރަހައްދުގައި މަސްދަޅުކޭސް ދޫކުރުމަށް ހަމަޖެހިފައިވަނީ 15 ތަނަކުންނެވެ. އެއީ މާލޭގެ 8 ސަރަހައްދަކާއި ހުޅުމާލެ 6 ސަރަހައްދަކާއި ވިލިމާލޭގެ 1 ސަރަހައްދުންނެވެ.
މިފްކޯގެ މައި އޮފީހަކީ މާލެއިން މަސްދަޅު ދޫކުރާ އެއް ތަނެވެ. މިގޮތުން މިރެއިން ފެށިގެން ހުކުރު ދުވަސް ފިޔަވައި ކޮންމެ ރެއަކު 8:00 އިން 11:00 އަށް މަސްދަޅު ދޫކުރުމަށް ވަނީ ހަމަޖެހިފައެވެ. މިހާރު ހަމަޖައްސާފައިވާ ގޮތުން މަސްދަޅުކޭސް ދޫކުރާނީ އަންނަ މަހުގެ 11 ވަނަ ދުވަހާ ހަމައަށެވެ.
މިފްކޯއިން މަސްދަޅުކޭސް ދޫކުރުމަށް މިފްކޯ މައި އިދާރާގެ ގޯތިތެރޭގައި ވަނީ ޚާއްސަ އިންތިޒާމުތަކެއް ގާއިމުކޮށްފައެވެ. މަސްދަޅުކޭސް ލިބިގަތުމަށް ރަޖިސްޓަރީކުރުމާ ގުޅޭގޮތުން މަޢުލޫމާތު ދިނުމާއި ރަޖިސްޓަރީކުރުމުގައި ދިމާވާ ކަންކަން ހައްލުކޮށްދިނުމަށް އެހީތެރިކަން ވެސް ފޯރުކޮށްދޭނެއެވެ.
ކިޔޫގައި ނުޖެހި މަސްދަޅުކޭސް ލިބޭގޮތް ހަމަޖެއްސުމަށް ސަރުކާރުން ވަނީ މިކަމަށް ޚާއްސަކޮށް ޕޯޓަލެއް ގާއިމުކޮށްފައެވެ. އެގޮތުން މަސްދަޅުކޭސް ދޫކުރުމަށް ހަމަޖެހިފައިވަނީ މި ޕޯޓަލް މެދުވެރިކޮށް ރަޖިސްޓަރީކޮށްގެންނެވެ.
މަސްދަޅުކޭސް ލިބިގަތުމަށް ރަޖިސްޓަރީ ކުރަންޖެހޭ ޕޯޓަލް އަކީ roadhahadhiya.mv އެވެ.