ރަމަޟާންމަހަށް ތައްޔާރުވުމުގެ ގޮތުން މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) ގެ މުވައްޒަފުންނަށް ދީނީ މަޢުލޫމާތު ދިނުމުގެ ސެޝަނެއް ބާއްވައިފިއެވެ.
“މަރުޙަބާ ރަމަޟާން” ޝިޢާރުގެ ދަށުން ކުރިއަށް ގެންދެވުނު މި ސެޝަން ބޭއްވީ މިފްކޯ ހެޑް އޮފީހުގައެވެ. އިސްލާމިކް މިނިސްޓްރީއާ ގުޅިގެން ބޭއްވި މި ސެޝަންގައި މަޢުލޫމާތު ދެއްވީ އައްޝައިޚް ޙަސަން ތައުފީޤެވެ. މިގޮތުން ރަމަޟާންމަހަށް ތައްޔާރުވުމާއި، ރަމަޟާންމަސް މުހިންމުވާ ސަބަބުތަކާއި، ރޯދައާ ގުޅޭ ފިޤުހީ ޙުކުމްތަކާއި، ރޯދަވެރިޔާގެ އަޚްލާޤާއި، ރޯދަމަހަށްފަހު އަމަލުތައް ބަހައްޓަންވާ ގޮތާ ގުޅޭގޮތުން މަޢުލޫމާތު ދެއްވާފައި ވެއެވެ.
މި ހަރަކާތުގެ މަޤްޞަދަކީ ބަރަކާތްތެރި ރަމަޟާންމަހާ ކުރިމަތިލާއިރު ދީނީގޮތުން ކޮންމެހެން އެނގެންޖެހޭ މަޢުލޫމާތުތައް މުވައްޒަފުންނަށް ފޯރުކޮށްދިނުމާއި، ރޫޙާނީގޮތުން ތާޒާކޮށް އިޚްލާޞްތެރިކަމާއެކު އަޅުކަމުގެ މައްސަރު ފަށައިގަތުމަށް މުވައްޒަފުންނަށް ބާރުއެޅުމެވެ.