މިއަހަރުގެ ޖަނަވަރީ މަހު މަސްވެރިންނަށް 40.3 މިލިއަނަށްވުރެ ގިނަ ރުފިޔާ ދޫކޮށްފިއެވެ.

މަސްވެރިންނަށް 48 ގަޑިއިރު ތެރޭ ފައިސާ ދޫކުރުމަށް ސަރުކާރުން ކަނޑައަޅާފައިވާ ސިޔާސަތާ އެއްގޮތަށް މިފްކޯއިން ދަނީ މަސްވެރިންނަށް ފައިސާ ދޫކުރަމުންނެވެ. މިގޮތުން ފާއިތުވެދިޔަ ޖަނަވަރީ މަހު 2301.73 ޓަނު ކަޅުބިލަމަސް މިފްކޯއަށް ކިރާފައި ވެއެވެ. އެއީ 199 ދޯންޏަކުންނެވެ. ޖަނަވަރީ މަހު ކިރުވި ކަޅުބިލަމަހަށް ޖުމުލަ 36،983،076.60 ރުފިޔާ މަސްވެރިންނަށް ދޫކޮށްފައި ވެއެވެ

ދާދިފަހުން މިފްކޯއަށް ކަންނެލި ގަންނަން ފަށާފައިވާއިރު 10 ކިލޯއިން މަތީގެ 80.45 ޓަނު ކަންނެލިމަސް ޖަނަވަރީ މަހު ކިރާފައި ވެއެވެ. މި ކެޓަގަރީގެ މަސް ކިރާފައިވަނީ 168 ދޯންޏަކުންނެވެ. މި ކެޓަގަރީގެ ކަންނެލިމަހަށް ޖުމުލަ 1،608،960 ރުފިޔާ ދޫކޮށްފައި ވެއެވެ.

ޖަނަވަރީ މަހު މިފްކޯއަށް ކިރުވާފައިވަނީ 15 ކިލޯއިން މަތީގެ 72.16 ޓަނު ކަންނެލިމަހެވެ. 148 ދޯންޏަކުން ކިރުވި މި ކެޓަގަރީގެ މަހަށް 1،804،075 ރުފިޔާ ދޫކޮށްފައި ވެއެވެ.

48 ގަޑިއިރު ތެރޭ ފައިސާ ދޫކުރުމުގެ އުސޫލުގެ ތެރެއިން ކަޅުބިލަމަހެކޭ އެއްފަދައިން ކަންނެލިމަހަށް ވެސް މިފްކޯއިން ދަނީ ފައިސާ ދޫކުރަމުންނެވެ.