މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) ގެ ހިންގުން ހަރުދަނާކުރުމަށް ޚާއްސަ ފިޔަވަޅުތަކެއް އަޅުއްވަމުން ގެންދަވާ ކަމަށާއި އެ މަސައްކަތުގެ ނަތީޖާ ފެންނަމުންދާ ކަމަށް މިފްކޯގެ ސީއީއޯ އަދި މެނޭޖިންގ ޑިރެކްޓަރ ބްރިގޭޑިއަރ ޖެނެރަލް (ރޓޑ) ފަރުޙަތު ޝަހީރު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ޕީއެސްއެމް ނިއުސްގެ “ރާއްޖެ މިއަދު” ޕްރޮގްރާމުގައި ރޭ ބައިވެރިވެވަޑައިގެން މިފްކޯގެ ހިންގުން ހަރުދަނާ ކުރުމަށް ކުރަމުންދާ މަސައްކަތްތަކާ ގުޅޭގޮތުން ވާހަކަފުޅު ދައްކަވަމުންނެވެ.

މިފްކޯގެ ސީއީއޯ ވިދާޅުވީ މިފްކޯއަށް ސަރުކާރުން ސަބްސިޑީއެއް ދެނީ ކުންފުނި ހިންގުމަށް ނޫން ކަމަށާއި އެއީ ސަރުކާރުން ކަނޑައަޅާފައިވާ އަގުގައި މަސް ގަތުމަށް ފޯރުކޮށްދޭ އިނާޔަތެއް ކަމަށެވެ. ނަމަވެސް ކުންފުނީގެ އެހެނިހެން ޚަރަދުތައް ކުރަމުންދަނީ ކުންފުނި ހިންގައިގެން ލިބޭ އާމްދަނީކަން ފާހަގަކުރެއްވިއެވެ.

ސީއީއޯ ވިދާޅުވީ މިފްކޯއަށް ދައުލަތުގެ ބަޖެޓުން ދޭ ސަބްސިޑީއަށް ބަރޯސާވާ މިންވަރު ކުޑަކޮށް، އަމިއްލަ ފައިމައްޗަށް ތެދުވުމަށް މަސައްކަތްތަކެއް ކުރެވެމުންދާ ކަމަށެވެ. މިގޮތުން ކުންފުނީގެ ހިންގުމުގެ ޚަރަދުތައް ކުޑަކުރުމަށް ވަރަށް ބޮޑު އަހަންމިއްޔަތެއް ދެއްވާ ކަމަށް ވިދާޅުވިއެވެ. އަދި އެ މަސައްކަތުގެ ނަތީޖާ މިހާރު ފެންނަމުންދާ ކަމަށް ވެސް ވިދާޅުވިއެވެ.

“ފާއިތުވި އަހަރު 4 ކުއާޓަރުގެ ތެރެއިން މެދުތެރޭގައި މަސްވެރިކަން ވަރަށް ދަށްވެގެން ދިޔަ. އެ ކުއާޓަރުގައި ކުޑަކޮށް ރަތްކޮށް ފެނުނު ކަމުގައި ވިޔަސް މުޅި އަހަރުގެ ހިސާބުތަކަށް ބަލާއިރު ކަޅުކޮށް އެބަފެނޭ. އެކަމުގެ ފެހި ސިގްނަލް އަޅުގަނޑުމެންނަށް އެބަފެނޭ.” ސީއީއީ ވިދާޅުވިއެވެ.

ސީއީއޯ ވިދާޅުވީ މިފްކޯގެ ހިންގުން ހަރުދަނާކުރުމަށް ކުރަމުންދާ މަސައްކަތުގެ މައިގަނޑު އެއް އަމާޒަކީ ދެފުށްފެންނަ، ނަޒާހަތްތެރި ކުންފުންޏަކަށް ހެދުން ކަމަށެވެ. އެގޮތުން މިފްކޯއިން ފޮރުވާނެ އެއްޗެއް ނޯންނާނެކަން ފާހަގަކުރައްވައި މިއަހަރު މިފްކޯގެ އައު ވެބްސައިޓް އިފުތިތާޙުކޮށް، މިފްކޯގެ މާލީ ހިސާބުކިތާބު ވެބްސައިޓުން ފެންނާނެ ގޮތް ހައްދަވާނެ ކަމަށް ވިދާޅުވިއެވެ.

“އަޅުގަނޑުމެން ވެރިންގެ މާލީ ބަޔާންތައް ފެންނަން ހުންނާނެ. ބޭނުންވަނީ ކުންފުނީގެ ނަން ރީތި ކުރުން.” ސީއީއޯ ވިދާޅުވިއެވެ.

މި ޕްރޮގްރާމުގައި މިފްކޯގެ ސްޓްރެޓެޖިކް ކޮންސަލްޓެންޓް އިބްރާހީމް އާޠިފް ޝަކޫރު ވެސް ބައިވެރިވެވަޑައިގެންނެވިއެވެ. އާޠިފް ވިދާޅުވީ ސަރުކާރުން މިފްކޯއަށް ދެމުން އަންނަ ސަބްސިޑީއާ ގުޅޭގޮތުން މިހާރު ސަރުކާރާއެކު އެއްބަސްވުމަކަށް އާދެވިފައިވާ ކަމަށެވެ. އަދި މިފްކޯގެ ހިންގުމަށް ގެންނަ ބަދަލުތަކާއެކު މިއަހަރު ނިމޭއިރު މިފްކޯއަށް ސަރުކާރުން ދެމުން އަންނަ ސަބްސިޑީ ދެބައިކޮށްފައި އެއްބަޔަށް ދަށްކުރެވޭނެ ކަމަށް ވެސް ވިދާޅުވިއެވެ.

“މިދިޔަ އަހަރު ދެމުންދިޔަ ސަބްސިޑީ ކިލޯއަކުން 1 ރުފިޔާ މިއަހަރު ތެރޭގައި މަދުކޮށްފައި، މިއަހަރު ނިމޭއިރު މިއަހަރު ދެއްވާ ސަބްސިޑީ ދެބައިކޮށްފައި އެއްބަޔަށް ކުޑަކުރުމަށް އަޅުގަނޑުމެން ރޭވުންތައް ރާވައި ސަރުކާރާއެކު އެއްބަސްވުމަކާ ހަމައަށް ގޮސްފައި އޮތީ.” އާޠިފް ވިދާޅުވިއެވެ.

48 ގަޑިއިރު ތެރޭގައި މަސްވެރިންނަށް ފައިސާ ދޫކުރުމަށް ސަރުކާރުން ވެފައިވާ ވަޢުދާ އެއްގޮތަށް މިފްކޯއިން ދަނީ މަސްވެރިންނަށް ފައިސާ ދޫކުރަމުންނެވެ. މިގޮތުން މިހާތަނަށް 973 މިލިއަނަށްވުރެ ގިނަ ރުފިޔާ މަސްވެރިންނަށް ދޫކޮށްފައި ވެއެވެ.