މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) ގެ ޕްރިމިއަމް އުފެއްދުންތައް ކަމަށްވާ “ރަންވަރު” ބްރޭންޑް ތަޢާރަފުކޮށްފިއެވެ.
މިކަމަށްޓަކައި ރޭ މިފްކޯ މަސްފިހާރައިގައި ބޭއްވި ޚާއްސަ ރަސްމިއްޔާތެއްގައި “ރަންވަރު” ބްރޭންޑް ތަޢާރަފުކޮށްދެއްވީ މިފްކޯގެ އެކްޓިންގ ޗެއަރމަން ޝިމާޒެވެ. މި ރަސްމިއްޔާތުގައި މިފްކޯގެ ސީއީއޯ ބްރިގޭޑިއަރ ޖެނެރަލް (ރޓޑ) ފަރުޙަތު ޝަހީރާއި، ސްޓްރެޓެޖިކް ކޮންސަލްޓެންޓް އާޠިފް ޝަކޫރާއި، މިފްކޯގެ އިސްވެރިން ބައިވެރިވެވަޑައިގެންނެވިއެވެ.
“ރަންވަރު” އަކީ މިފްކޯގެ ފަސްމީރު ބްރޭންޑުގެ ދަށުން ނެރުނު ޕްރިމިއަމް އުފެއްދުންތަކަށް ޚާއްސަ ނަމެކެވެ. މިއީ މިގޮތަށް ޕްރިމިއަމް އުފެއްދުންތަކަށް ޚާއްސަކޮށް މިފްކޯއިން ވަކި ބްރޭންޑެއް ތަޢާރަފުކުރި ފުރަތަމަ ފަހަރެވެ. މިގޮތުން “ރަންވަރު” ގެ ދަށުން ރޭ ވަނީ ޖުމުލަ 5 އުފެއްދުމެއް ތަޢާރަފުކޮށް ބާޒާރަށް ނެރެފައެވެ.
މުޅިން އަލަށް ތަޢާރަފުކުރެވުނު މި އުފެއްދުންތަކާ ގުޅޭގޮތުން ނޫސްވެރިންނަށް މަޢުލޫމާތު ދެއްވަމުން މިފްކޯގެ ލޯކަލް ސޭލްސް އެންޑް މާކެޓިންގ ޖެނެރަލް މެނޭޖަރ ޙަސަން ޒާހިދު މުޙައްމަދު ވިދާޅުވީ ރަންވަރަކީ ޕްރިމިއަމް ކޮލިޓީގައި ބާޒާރަށް ނެރެވުނު އުފެއްދުންތަކެއް ކަމަށެވެ. އެގޮތުން މަސްދަޅުގެ ދެ އުފެއްދުމަކާއި ރިހާކުރުގެ ތިން އުފެއްދުމެއް ނެރެފައިވާކަން ޒާހިދު ފާހަގަކުރެއްވިއެވެ.
“މިފްކޯގެ އަމާޒަކީ ރައްޔިތުން ބަލައިގަންނާނެ ފަދަ އުފެއްދުންތަކެއް ބާޒާރަށް ނެރުން. އެގޮތުން މިރޭ ބާޒާރަށް މިނެރުނު އުފެއްދުންތަކުގެ އިތުރަށް ކުރިއަށް އޮތް ތަނުގައިވެސް ރަންވަރު ބްރޭންޑުގެ ދަށުން ތަފާތު އުފެއްދުންތައް އަޅުގަނޑުމެން ތަޢާރަފު ކުރާނަން.” ޒާހިދު ވިދާޅުވިއެވެ.
ޒާހިދު ވިދާޅުވީ ރަންވަރަކީ ރާއްޖޭގެ ބާޒާރަށް ޚާއްސަކޮށް މިފްކޯއިން ތަޢާރަފުކުރި ބްރޭންޑެއް ކަމަށާއި ބޭރުގެ ބާޒާރަށް ޚާއްސަކޮށް ތައްޔާރުކުރާ އުފެއްދުންތަކެކޭ އެއްގޮތަށް، ރަންވަރުގެ އުފެއްދުންތަކަށް ވެސް ބޮޑު ތަރުހީބެއް ލިބޭނެ ކަމަށް އުންމީދު ކުރައްވާ ކަމަށެވެ. އަދި ކުރިއަށް އޮތް ތަނުގައި އިކޮނޮމީ ޕެކްތަކެއް ވެސް ތަޢާރަފުކުރެވޭނެ ކަމަށް ވިދާޅުވިއެވެ.
ރަންވަރު ބްރޭންޑުގެ ދަށުން ރޭ ނެރުނު 5 އުފެއްދުމަކީ:
- ކަންނެލި ސްޓޭކް މަސްދަޅު
- ކަންނެލި ބަނޑައިދޫ މަސްދަޅު
- ރިހާކުރު (މެއި، ބިސް، ލަގޮނޑިއާ އެކު)
- ރިހާކުރު (ހިމުން މުގުރިމަހާ އެކު)
- ތެލުލި ރިހާކުރު (ހިމުން މުގުރިމަހާ އެކު)
މި އުފެއްދުންތަކުގެ ރަހަ ދައްކައިލުން ވެސް ރޭ ކުރިއަށް ގެންދިޔައެވެ. އެގޮތުން ރަންވަރުގެ މި އުފެއްދުންތައް ވަރަށް ކަމުދާ ކަމަށް ތަޖުރިބާކުރި މީހުން ބުނެފައި ވެއެވެ.
ކުރިއަށް އޮތް 3 ދުވަހުވެސް ރަންވަރުގެ އުފެއްދުންތަކުގެ ރަހަ ބަލައި ތަޖުރިބާކުރުމުގެ ފުރުސަތު މިފްކޯ މަސްފިހާރައިގައި ހަމަޖެހިފައި ހުންނާނެއެވެ. އަދި މާލެ ސަރަހައްދުގެ މިފްކޯ ފިހާރަތަކުން މިއަދުން ފެށިގެން މި އުފެއްދުންތައް ލިބެން ހުންނާނެއެވެ.
ރަންވަރު ބްރޭންޑަކީ މިފްކޯގެ އުފެއްދުންތައް އިތުރުކޮށް، ކުންފުނީގެ ވިޔަފާރި ފުޅާކުރުމަށް ކުރެވޭ މަސައްކަތުގެ ތެރެއިން ބައެކެވެ.