ރޯދަ ހަދިޔާގެ ގޮތުގައި ސަރުކާރުން ކޮންމެ ގޭބިސީއަކަށް ދޭ މަސްދަޅު ކޭސް އުފެއްދުމުގެ މަސައްކަތް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން ނިންމާލައިފިއެވެ.
މިއަހަރު ރޯދަ ހަދިޔާގެ ގޮތުގައި ސަރުކާރުން ފޯރުކޮށްދޭ މަސްދަޅުކޭސް އުފެއްދުމުގެ މަސައްކަތް މިފްކޯއިން ފެށީ އޮކްޓޯބަރު މަހުގެ ފަހުކޮޅުއެވެ. ތިންމަސް ދުވަހުގެ މަސައްކަތާއެކު މިފްކޯއިން މިއަދު ވަނީ މި މަސައްކަތް މުޅިން ނިންމާލާފައެވެ.
ރޯދަ ހަދިޔާގެ ގޮތުގައި ސަރުކާރުން އެދިގެން މިފަހަރު މިފްކޯއިން އުފެއްދީ ޖުމުލަ 118،977 މަސްދަޅު ކޭހެވެ.
މިފްކޯއިން މި މަސައްކަތް ކުރިއަށް ގެންދިޔައީ ސަރުކާރުން މަސްދަޅުކޭސް ބަހަން ފަށަންވާއިރަށް މަސައްކަތް ނިންމާލުމަށް އަމާޒުހިފައިގެންނެވެ. މަސައްކަތުގެ %100 މިއަދު ނިންމައިލެވުމާއެކު މިވަނީ އެ އަމާޒު ހާސިލުވެފައެވެ.
މަސްދަޅު ކޭސްތައް ބެހުމުގެ އިންތިޒާމުތައް ހަމަޖައްސަނީ ސިޓީތަކާބެހޭ މިނިސްޓްރީއާއި އެސްޓީއޯ ގުޅިގެންނެވެ. މިގޮތުން ރާއްޖޭގެ އުތުރާއި ދެކުނުގެ ސަރަހައްދުތަކަށް ފަސޭހައިން ފޯރުކޮށްދިނުމަށްޓަކައި އައްޑޫ ސިޓީއާއި ކުޅުދުއްފުށި ސިޓީގައި ބައެއް ސްޓޮކް ވަނީ ރައްކާކޮށްފައެވެ.