ބޮޑުކަންނެލި މަސްވެރިންނަށް ދިމާވެފައިވާ ގޮންޖެހުންތަކަށް ހައްލެއް ހޯދައިދިނުމަށް ސަރުކާރުން ކުރަމުންދާ މަސައްކަތުގެ ދަށުން މިފްކޯއިން ކަނޑުއޮތްގިރިން ބޮޑުކަންނެލި ގަންނަން ފަށައިފިއެވެ.

ކަނޑުއޮތްގިރިން ބޮޑުކަންނެލި ގަންނަން ފެށީ އިއްޔެއެވެ. މިގޮތުން ބޮޑުކަންނެލި ގަންނަނީ 15 ކިލޯއިން މަތީގެ ކަންނެލި ކިލޯއަކަށް 25ރ. ގެ މަގުންނެވެ.

ކަނޑުއޮތްގިރިން ބޮޑުކަންނެލި ގަންނަން ފެށުމާ ގުޅިގެން ފިޝަރީޒް މިނިސްޓަރު އަޙްމަދު ޝިޔާމް އާއި މިފްކޯގެ ސީއީއޯ ބްރިގޭޑިއަރ ޖެނެރަލް (ރޓޑ) ފަރުޙަތު ޝަހީރު ވަނީ މިއަދު ކަނޑުއޮތްގިރިއަށް ޒިޔާރަތްކުރައްވައި މަސައްކަތް ކުރިއަށްދާ ގޮތް ބައްލަވައިލައްވާފައެވެ.

ނޫސްވެރިންނަށް މަޢުލޫމާތު ދެއްވަމުން މިފްކޯގެ ސީއީއޯ ބްރިގޭޑިއާ ޖެނެރަލް (ރޓޑ) ފަރުޙަތު ޝަހީރު ވިދާޅުވީ ކުޑަ ދުވަސްކޮޅެއްގެ ތެރޭގައި ކަނޑުއޮތްގިރި އަނބުރާ އޮޕަރޭޝަނަށް ގެނެވުނީ މިފްކޯގެ ހީވާގި މުވައްޒަފުންގެ މަސައްކަތުން ކަމަށެވެ. އެގޮތުން ކަނޑުއޮތްގިރި މަސް ގަންނަން ތައްޔާރުކޮށް ބޮޑުކަންނެލި ގަންނަން އިއްޔެ ފަށާފައިވާ ކަމަށެވެ.

“މިހާރު ކަނޑުއޮތްގިރި އަނބުރާ އޮޕަރޭޝަނަށް ގެނެސް ބޮޑުކަންނެލި މަސްވެރިންގެ އަތުން މަސް ގަންނަން މިފެށީ. އެގޮތުން 15 ކިލޯއަށްވުރެ މަތީގެ ކަންނެލި 25 ރުފިޔާގެ ރޭޓުން ކަނޑުއޮތްގިރިންނާއި މި ސަރަހައްދުގެ މަސްވެރިންގެ އަތުން ގަންނަމުންދާނެ.” ސީއީއޯ ވިދާޅުވިއެވެ.

މީގެ އިތުރަށް ކަނޑުއޮތްގިރިން ކަޅުބިލަމަސް ވެސް ގަންނަން ފަށާފައިވާ ކަމަށް ސީއީއޯ ވިދާޅުވިއެވެ.

މިފްކޯގެ ސީއީއޯ ވިދާޅުވީ މިއީ ފެށުމެއް ކަމަށާއި ދާދި އަވަހަށް ކަނޑުއޮތްގިރީގައި ކޯލްޑް ސްޓޯރޭޖް ގާއިމުކޮށް، މަސްވެރިންނަށް އެތަނުން ތެލާއި އައިސް ވެސް ލިބޭނެ އިންތިޒާމު ހަމަޖައްސަވާނެ ކަމަށެވެ. މީގެ އިތުރަށް، ކުރިއަށް އޮތް ތަނުގައި ކަނޑުއޮތްގިރީގައި މަސް ޕްރޮސެސް ކުރުމުގެ އިތުރަށް މިފްކޯގެ އެހެން ސެންޓަރުތަކަށް މަސް ގެންގޮސް ޕްރޮސެސްކޮށް، ޤައުމީ ބާޒާރަށް ނެރެ އެކްސްޕޯޓް ވެސް ކުރެވޭގޮތަށް މަސްވެރިންގެ މައި ހަބަކަށް ކަނޑުއޮތްގިރި ހެދުމަށް މަސައްކަތް ކުރައްވާނެ ކަމަށް ސީއީއޯ ވިދާޅުވިއެވެ.

ބޮޑުކަންނެލި މަސްވެރިކަމަކީ ރާއްޖޭގެ މަސްވެރިކަމުގެ ސިނާޢަތުގެ މުހިންމު ބަޔަކަށް ވާއިރު، ބޮޑުކަންނެލި މަސްވެރިންނަށް ދިމާވެފައިވާ އެންމެ ބޮޑު އެއް ގޮންޖެހުމަކީ މިފްކޯއަށް ބޮޑުކަންނެލި ނުކިރުމެވެ. ނަމަވެސް ކަނޑުއޮތްގިރިން ބޮޑުކަންނެލި ގަންނަން ފެށުމާ ގުޅިގެން އެކަމަށް މިވަނީ ވަރަށް ބޮޑު ހައްލެއް ލިބިގެން ގޮސްފައެވެ.